ന്യൂഡല്ഹി: ചാന്സലര് സ്ഥാനത്ത് നിന്ന് തന്നെ മാറ്റാനുള്ള ഓര്ഡിനന്സ് രാഷ്ട്രപതിക്ക് അയക്കുമെന്ന് സൂചിപ്പിച്ച് ഗവര്ണര് ആരിഫ് മുഹമ്മദ് ഖാന്.
തന്നെയാണ് ഓര്ഡിനന്സിലൂടെ ലക്ഷ്യമിടുന്നതെങ്കില് താന് തന്നെ അതിന്റെ വിധികര്ത്താവാകില്ല. ഓര്ഡിനന്സ് കണ്ട ശേഷം തീരുമാനമെടുക്കുമെന്നും ഗവര്ണര് വ്യക്തമാക്കി.
നിയമപരമായി നീങ്ങാനാണ് സര്ക്കാരിന്റെ തീരുമാനമെങ്കില് അത് സ്വാഗതം ചെയ്യുന്നുവെന്നും ആരിഫ് മുഹമ്മദ് ഖാന് പറഞ്ഞു. ദിവസങ്ങള് നീണ്ട ആശയക്കുഴപ്പത്തിനൊടുവില് ഇന്നലെ രാവിലെ 11 മണിയോടെയാണ് സര്വ്വകലാശാലകളുടെ ചാന്സലര് സ്ഥാനത്ത് നിന്നും ഗവര്ണറെ മാറ്റിക്കൊണ്ടുള്ള ഓര്ഡിനന്സ് സര്ക്കാര് രാജ്ഭവനിലേക്ക് അയച്ചത്. സാധാരണ ഗതിയില് ഒരു ഓര്ഡിനന്സ് മന്ത്രിസഭ പാസാക്കിയതിന്റെ പിറ്റേന്ന് തന്നെ എത്തിക്കാറുണ്ട്. ഇത്തവണ മൂന്നാം ദിവസമാണ് ഫയല് കൈമാറിയത്. ഡല്ഹിയിലെത്തിയ ഗവര്ണര് ഇനി 20ന് മടങ്ങിയെത്തും.
ഗവര്ണര് എന്ത് തീരുമാനമെടുത്താലും അതേ ഓര്ഡിനന്സ് ബില് അടുത്ത മാസം ആദ്യം നിയമസഭയില് അവതരിപ്പിക്കാനാണ് സര്ക്കാര് ആലോചിക്കുന്നത്. എന്നാല് ഓര്ഡിനന്സ് രാഷ്ട്രപതിയുടെ പരിഗണനയിലിരിക്കെ ബില് നിയമസഭയില് അവതരിപ്പിക്കാന് കഴിയുമോ എന്ന കാര്യത്തില് നിയമപ്രശ്നം ഉയര്ന്നിട്ടുണ്ട്. കേരളത്തില് മുമ്ബൊരിക്കലും ഇത്തരമൊരു സാഹചര്യം ഉണ്ടായിട്ടില്ലെന്ന് നിയമവകുപ്പ് സര്ക്കാരിനെ അറിയിച്ചിട്ടുണ്ട്.
