കൊച്ചി: നടിയെ ആക്രമിച്ച കേസ് എറണാകുളം പ്രിന്സിപ്പല് സെഷന്സ് കോടതി ഇന്ന് പരിഗണിക്കും. കേസ് പരിഗണിക്കാന് പ്രിന്സിപ്പല് സെഷന്സ് കോടതിക്ക് അധികാരമില്ലെന്ന പ്രോസിക്യൂഷന്റെയും, അതിജീവിതയുടെയും ഹര്ജികളില് വാദം കേള്ക്കും. അതേസമയം, നടന് ദിലീപിന്റെ ജാമ്യം റദ്ദാക്കണമെന്ന ക്രൈം ബ്രാഞ്ചിന്റെ ആവശ്യത്തില് ഹൈക്കോടതി വാദം കേള്ക്കും
നടിയെ ആക്രമിച്ച കേസ് പരിഗണിക്കാന് പ്രിന്സിപ്പല് സെഷന്സ് കോടതിക്ക് അധികാരമില്ലെന്ന പ്രോസിക്യൂഷന്റെയും, അതിജീവിതയുടെയും ഹര്ജികളില് ജഡ്ജി ഹണി എം. വര്ഗീസാണ് വാദം കേള്ക്കുന്നത്. സിബിഐ കോടതിക്കാണ് കേസ് നടത്താന് ഹൈക്കോടതി അനുമതി നല്കിയിരുന്നത്. ജോലിഭാരം കാരണം പ്രിന്സിപ്പല് സെഷന്സ് കോടതിക്ക് കേസ് കൈമാറാന് ഹൈക്കോടതി നേരത്തെ നിലപാടെടുത്തതും പ്രോസിക്യൂഷന്റെ ഹര്ജിയില് ചൂണ്ടിക്കാട്ടിയിരുന്നു. കേസ് ഫയല് ഏത് കോടതിയുടെ അധികാരപരിധിയിലെന്ന് തീരുമാനിക്കണമെന്നും സ്പെഷ്യല് പ്രോസിക്യൂട്ടര് അജകുമാര് സമര്പ്പിച്ച ഹര്ജിയില് ആവശ്യമുണ്ട്. കേസ് രേഖകള് സിബിഐ കോടതിയിലേക്ക് തിരികെ അയക്കണമെന്നാണ് അതിജീവിതയുടെ ആവശ്യം. പ്രതികളുടെ വാദം കൂടി കേട്ട ശേഷം തീരുമാനമെടുക്കുമെന്ന് കോടതി വ്യക്തമാക്കിയിരുന്നു.
