കൊച്ചി: നടിയെ ആക്രമിച്ച കേസ് പരിഗണിക്കാന് എറണാകുളം പ്രിന്സിപ്പല് സെഷന്സ് കോടതിക്ക് കഴിയില്ലെന്ന് പ്രോസിക്യൂഷന്. സമാന ആക്ഷേപവുമായി അതിജീവിതയും വിചാരണകോടതിയെ സമീപിച്ചു. ജഡ്ജി ഹണി എം. വര്ഗീസിന് മുന്നില് ഇരുകൂട്ടരും അപേക്ഷ സമര്പ്പിച്ചു
സിബിഐ കോടതിക്കാണ് കേസ് നടത്താന് ഹൈക്കോടതി അനുമതി നല്കിയിരുന്നതെന്നാണ് വാദിക്കുന്നത്. ജോലിഭാരം കാരണം പ്രിന്സിപ്പല് സെഷന്സ് കോടതിക്ക് കേസ് കൈമാറാന് കഴിയില്ലെന്ന് ഹൈക്കോടതി നേരത്തെ നിലപാടെടുത്തതും പ്രോസിക്യൂഷന് ചൂണ്ടിക്കാട്ടി. കേസ് ഫയല് ഏത് കോടതിയുടെ അധികാരപരിധിയിലെന്ന് തീരുമാനിക്കണമെന്ന് സ്പെഷ്യല് പ്രോസിക്യൂട്ടര് അജകുമാര് ഹര്ജിയില് പറയുന്നു.
ഹണി എം. വര്ഗീസ് എറണാകുളം പ്രിന്സിപ്പല് സെഷന്സ് ജഡ്ജിയായപ്പോള് കേസ് രേഖകള് സെഷന്സ് കോടതിയിലേക്ക് മാറ്റിയിരുന്നു. ഇക്കാര്യത്തില് പ്രതികളുടെ ആക്ഷേപം സമര്പ്പിക്കാന് സമയം നല്കി. കേസ് ഈ മാസം 11 ന് വീണ്ടും പരിഗണിക്കും.
എറണാകുളം പ്രിന്സിപ്പല് സെഷന്സ് കോടതി ജഡ്ജിയായ ഹണി എം വര്ഗീസിനെ തന്നെ ആക്രമിച്ച കേസിന്റെ വിചാരണ ചുമതലയില് നിന്ന് നീക്കണമെന്നാവശ്യപ്പെട്ട് അതിജീവിത തന്നെ മുന്നോട്ടു വന്നിരുന്നു. ഇതിന് പിന്നാലെ ഹൈക്കോടതി രജിസ്ട്രാറുടെ ഓഫീസ് ഈ ആവശ്യം തള്ളി ഉത്തരവിറക്കിയിരുന്നു. ഇതിന്റെ അടിസ്ഥാനത്തില് വിചാരണ നടത്തിയിരുന്ന സി ബി ഐ പ്രത്യേക കോടതിയില് നിന്ന് കേസ് രേഖകളെല്ലാം സെഷന്സ് കോടതിയിലേക്ക് മാറ്റിയതായി പ്രോസിക്യൂഷനേയും പ്രതിഭാഗത്തേയും രേഖാമൂലം അറിയിച്ചു.
