പാലക്കാട്: ഷാജ് കിരണിനെ തനിക്ക് വര്ഷങ്ങള്ക്ക് മുന്പ്തന്നെ അറിയാമെന്ന് സ്വപ്ന സുരേഷ്. ഷാജ് കിരണുമായി ബന്ധപ്പെട്ട ഫോണ് സംഭാഷണത്തെക്കുറിച്ച് മാദ്ധ്യമപ്രവര്ത്തകരോട് സംസാരിക്കുകയായിരുന്നു അവര്.
എം.ശിവശങ്കറിന്റെ പുസ്തകം പുറത്തുവന്ന ശേഷമാണ് പരിചയമായത്. മജിസ്ട്രേറ്റിന് മൊഴി നല്കിയതിനെത്തുടര്ന്ന് ഷാജുമായി താന് കണ്ടിരുന്നു. സരിത്തും ഒപ്പമുണ്ടായിരുന്നു. അന്ന് ഷാജ് കിരണ് ഭീഷണിപ്പെടുത്തിയതായി സ്വപ്ന സുരേഷ് പറഞ്ഞു. ‘കളിച്ചിരിക്കുന്നത് ആരോടാണെന്നറിയാമോ? നാളെ സരിത്തിനെ പൊക്കും, അദ്ദേഹത്തിന്റെ മകളെക്കുറിച്ച് പറഞ്ഞാല് സഹിക്കില്ല.’ എന്നാണ് ഷാജ് പറഞ്ഞതെന്ന് സ്വപ്ന അറിയിച്ചു.
തന്റെ മൊഴിയില് പറഞ്ഞിരിക്കുന്നത് എന്താണെന്ന് പറയുക മാത്രമാണ് ചെയ്തത്. മാദ്ധ്യമങ്ങളെ കണ്ട് വിവരം പറഞ്ഞതിന് പിറ്റേന്ന് തനിക്ക് ഫോണ് കോള് വന്നു. ഷാജ് പറഞ്ഞതുപോലെ സരിതിനെ കിഡ്നാപ്പ് ചെയ്തു എന്നായിരുന്നു അത്. തുടര്ന്ന് സഹായത്തിനായി ഷാജിനെ വിളിച്ചതാണ്. വിജിലന്സ് ആണ് സരിതിനെ കൊണ്ടുപോയതെന്നും ഒരുമണിക്കൂറിനകം വിടുമെന്നും ഷാജ് കിരണ് അറിയിച്ചതായി സ്വപ്ന പറഞ്ഞു.
തന്റെ സുഹൃത്തായ ഷാജ് കിരണിനെതിരെ തിരിയാന് താല്പര്യമില്ലായിരുന്നെന്നും എന്നാല് അത്രയധികം മാനസിക വിഷമങ്ങളും ഭീഷണികളും ഉണ്ടായതുകൊണ്ടാണ് കോള് റെക്കാഡ് ചെയ്യേണ്ടിവന്നതെന്നും സ്വപ്ന അഭിപ്രായപ്പെട്ടു.
